Aadhaar Address Update : હવે લાઈટ બિલ કે ભાડાકરાર વગર પણ આધાર કાર્ડમાં સરનામું બદલાશે, જાણો નવી પ્રોસેસ

બીજા શહેરમાં રહેવા જતા લોકો, ભાડુઆતો અને વડીલો માટે આધાર કાર્ડ સંબંધિત એક ખૂબ જ રાહત આપનારા સમાચાર સામે આવ્યા છે. હવે આધાર કાર્ડમાં પોતાનું નવું સરનામું (એડ્રેસ) બદલવા માટે દરેક વખતે લાઈટ બિલ, ભાડાકરાર કે અન્ય કોઈ સરકારી દસ્તાવેજોની જરૂર નહીં પડે. જો તમારી પાસે નવા સરનામાનો કોઈ સત્તાવાર પુરાવો ન હોય, તો પણ તમે એક ખાસ પ્રક્રિયા દ્વારા આધાર કાર્ડમાં નવું એડ્રેસ અપડેટ કરાવી શકો છો.

UIDAI (યુનિક આઇડેન્ટિફિકેશન ઓથોરિટી ઓફ ઇન્ડિયા) દ્વારા એક એવી વિશેષ સુવિધા આપવામાં આવી છે, જેમાં તમે પરિવારના કોઈ સભ્ય અથવા તમારા મકાનમાલિકના આધાર કાર્ડમાં નોંધાયેલા સરનામાના આધારે તમારું નવું એડ્રેસ અપડેટ કરાવી શકો છો.

આવો જાણીએ કે આ નવી સિસ્ટમ કેવી રીતે કામ કરે છે અને તેનાથી સામાન્ય લોકોને શું ફાયદો થશે:

વડીલો અને ભાડુઆતો માટે આરામદાયક સુવિધા: ઘણીવાર એવું બને છે કે ગામડા કે નાના શહેરમાંથી વૃદ્ધ માતા-પિતા પોતાના દીકરા કે દીકરી પાસે રહેવા માટે મોટા શહેરમાં આવે છે. તેમની પાસે નવા ઘરનું કોઈ સરકારી ડોક્યુમેન્ટ હોતું નથી. આ સ્થિતિમાં તેઓ પરિવારના સભ્યના આધાર એડ્રેસનો ઉપયોગ કરીને પોતાનું સરનામું બદલી શકે છે. આ માટે સંબંધિત પરિવારના સભ્યએ માત્ર ડિજિટલ રીતે રિકવેસ્ટ મંજૂર કરવાની રહેશે અને તે જ સરનામું વડીલોના કાર્ડમાં અપડેટ થઈ જશે.

UIDAI ના જણાવ્યા અનુસાર, આ સુવિધા માત્ર પરિવાર પૂરતી મર્યાદિત નથી, પરંતુ ભાડુઆતો માટે પણ ખૂબ જ ઉપયોગી સાબિત થઈ શકે છે. નવા શહેરમાં શિફ્ટ થયા પછી ભાડુઆતો પાસે બેંક ખાતું ખોલાવવા, ચેકબુક કે ક્રેડિટ કાર્ડ મેળવવા માટે નવા એડ્રેસનો પુરાવો હોતો નથી. હવે ભાડુઆત પોતાના મકાનમાલિકના આધાર એડ્રેસના આધારે અપડેટ રિકવેસ્ટ મોકલી શકે છે. મકાનમાલિક ઓનલાઇન મંજૂરી આપશે એટલે ભાડુઆતનું એડ્રેસ બદલાઈ જશે. આનાથી એક પ્રકારે ટેનન્ટ વેરિફિકેશન પણ ઓટોમેટિક થઈ જશે.

“Head of Family” ના બદલે હવે “Family Member”: UIDAI એ આ પ્રક્રિયાને વધુ સરળ બનાવવા માટે નિયમો અને ભાષામાં મોટો બદલાવ કર્યો છે. પહેલાં આ સિસ્ટમમાં “Head of Family (HOF)” શબ્દનો ઉપયોગ થતો હતો, જેના કારણે લોકો મૂંઝવણમાં મુકાતા હતા કે માત્ર ઘરના વડીલ જ આ સુવિધા આપી શકે. હવે નવી એપ્લિકેશનમાં HOF ના બદલે “Family Member” શબ્દ રાખવામાં આવ્યો છે. એટલે કે પરિવારનો કોઈ પણ સભ્ય — ભલે તે દીકરો હોય, દીકરી હોય, માતા-પિતા હોય કે અન્ય કોઈ નજીકના સભ્ય હોય — તે પોતાના એડ્રેસના આધારે બીજા સભ્યનું સરનામું બદલાવી આપી શકે છે.

બાયોમેટ્રિક લોક-અનલોક અને ફેસ વેરિફિકેશન થયું સરળ: નવી આધાર એપ્લિકેશનમાં સુરક્ષા ફીચર્સને પહેલાં કરતાં વધુ મજબૂત અને સરળ બનાવવામાં આવ્યા છે. હવે યુઝર્સ પોતાના ફિંગરપ્રિન્ટ અને ફેસ બાયોમેટ્રિક્સને એપ્લિકેશનમાં માત્ર એક બટન દબાવીને લોક કે અનલોક કરી શકે છે, જેથી કોઈ અન્ય વ્યક્તિ તેનો દુરુપયોગ ન કરી શકે. પહેલાં આ માટે પોર્ટલ પર લોગઇન કરવું પડતું હતું.

આ ઉપરાંત, એપ્લિકેશનમાં “Show, Share and Verify” જેવા શાનદાર ફીચર્સ પણ ઉમેરાયા છે. ફેસ ઓથેન્ટિકેશનના માધ્યમથી મોબાઈલ નંબર અને એડ્રેસ અપડેટ જેવી સેવાઓ ઘરબેઠા ઉપલબ્ધ કરાવી દેવાઈ છે. પહેલાં મોબાઈલ નંબર અપડેટ કરાવવા માટે આધાર સેન્ટર પર ધક્કા ખાવા પડતા હતા, પરંતુ હવે ફેસ વેરિફિકેશન અને ઓટીપીના આધારે આ તમામ કામો ઘરે બેઠા મોબાઈલ એપથી જ પૂરા કરી શકાશે.

પોકેટ મની બચાવવાનો બેસ્ટ રસ્તો, દેશની આ 5 મોટી બેંકો બાળકો માટે ખોલી રહી છે ખાસ ‘ઝીરો બેલેન્સ’ ખાતા