મધ્યમ વર્ગના પરિવારો માટે પોતાનું ઘર હોવું એ એક મોટું સપનું હોય છે. પરંતુ આ સપનું પૂરું કરવા માટે મોટાભાગના લોકો હોમ લોન લે છે અને જો લોનની મુદત 30 વર્ષની હોય, તો આખી જિંદગી માત્ર EMI ભરવામાં જ નીકળી જાય છે. 30 વર્ષના સમયગાળામાં તમે જેટલી લોન લીધી હોય છે, તેના કરતાં વધુ રકમ તો માત્ર વ્યાજ પેટે ચૂકવવી પડે છે.

ઉદાહરણ તરીકે, જો તમે 7.5% ના વાર્ષિક વ્યાજ દરે ₹1 કરોડની હોમ લોન 30 વર્ષ માટે લો છો, તો તમારી માસિક EMI ₹69,921 થશે. આ 30 વર્ષમાં તમે ₹1 કરોડની મૂળ રકમ સામે ₹1.51 કરોડથી વધુ તો માત્ર વ્યાજ ચૂકવશો, એટલે કે કુલ ચૂકવણી ₹2.51 કરોડ જેટલી થશે.

લોન લેનારાઓને EMI બાબતે થતી ગેરસમજ: ઘણા લોકો માને છે કે ₹69,921 ની EMI ભરવાથી લોનની મૂળ રકમ (પ્રિન્સિપલ) તેટલી ઘટી જાય છે, પરંતુ વાસ્તવમાં એવું હોતું નથી. શરૂઆતના વર્ષોમાં ₹69,921 ની EMI માંથી લગભગ 90% રકમ (આશરે ₹62,500) માત્ર વ્યાજ પેટે કપાય છે, જ્યારે મૂળ રકમમાં માત્ર ₹7,421 નો જ ઘટાડો થાય છે. શરૂઆતના 15 વર્ષ સુધી EMI નો મોટો હિસ્સો વ્યાજ ચૂકવવામાં જ જાય છે. 15 વર્ષ પછી જ પ્રિન્સિપલ અમાઉન્ટ ઝડપથી ઘટવાનું શરૂ થાય છે.

હોમ લોન ઝડપથી પૂરી કરવા માટે બે અસરકારક ફોર્મ્યુલા છે: 1. હોમ લોનમાં ‘પ્લસ વન’ (Plus One) ફોર્મ્યુલા, આ ફોર્મ્યુલા મુજબ તમારે વર્ષમાં નિયમિત 12 EMI ઉપરાંત 1 વધારાની EMI ચૂકવવાની રહેશે (એટલે કે વર્ષે કુલ 13 EMI ભરવી). જ્યારે તમે નિયમિત EMI ભરો છો ત્યારે તેનો મોટો હિસ્સો વ્યાજમાં જાય છે, પરંતુ આ 13મી વધારાની EMI સીધી જ તમારી મૂળ રકમ (પ્રિન્સિપલ) માંથી બાદ થાય છે. જો તમે દર વર્ષે માત્ર 1 વધારાની EMI ભરવાનું શરૂ કરો છો, તો તમારી 30 વર્ષની હોમ લોન ઘટીને માત્ર 23 વર્ષ અને 7 મહિના માં જ પૂરી થઈ જશે.

2. EMI માં દર વર્ષે ’10 ટકા વધારા’ ની ફોર્મ્યુલા: જેમ જેમ તમારી આવક કે સેલેરીમાં વાર્ષિક વધારો થાય, તેમ તેમ તમારી હોમ લોનની EMI માં પણ દર વર્ષે 10% નો વધારો કરતા જાઓ. ઉદાહરણ તરીકે, જો તમારી માસિક EMI ₹20,000 હોય, તો બીજા વર્ષે તેને 10% વધારીને ₹22,000 કરો અને તે પછીના વર્ષે ફરી 10% વધારો. આ પદ્ધતિ સતત ચાલુ રાખવાથી 30 વર્ષની લોન ઘટીને માત્ર 11 વર્ષ અને 2 મહિના માં પૂર્ણ થઈ જશે.

બંને ફોર્મ્યુલા સાથે અપનાવવાથી 11 વર્ષથી પણ ઓછા સમયમાં લોન મુક્ત: જો તમે ‘પ્લસ વન’ અને ‘10% વાર્ષિક વધારો’ બંને ફોર્મ્યુલા એકસાથે અમલમાં મૂકો છો (એટલે કે દર વર્ષે 13 EMI ભરો અને દર વર્ષે EMI માં 10% નો વધારો પણ કરો), તો તમારી 30 વર્ષની હોમ લોન માત્ર 10 વર્ષ અને 6 મહિના માં જ સંપૂર્ણપણે ચૂકતે થઈ જશે. હોમ લોન ઝડપથી ખતમ કરવાનો સીધો નિયમ એ છે કે કોઈપણ રીતે મૂળ રકમ (પ્રિન્સિપલ અમાઉન્ટ) ઝડપથી ઘટાડવી, જેથી વ્યાજનો બોજ આપોઆપ ઘટી જાય.

ડિસ્ક્લેમર:

આ આર્ટિકલ માત્ર માહિતી આપવાના હેતુથી તૈયાર કરવામાં આવ્યો છે. આને કોઈ પણ પ્રકારની ઇન્વેસ્ટમેન્ટ કે શેર ખરીદવા-વેચવાની સલાહ માનવી નહીં. બજારમાં પૈસા રોકતા પહેલાં હંમેશા તમારા પ્રમાણિત નાણાકીય સલાહકારની મદદ અવશ્ય લો.

મેડિકલ ઇમરજન્સીમાં તાત્કાલિક જોઈએ છે બ્લડ, પ્લાઝમા કે પ્લેટલેટ્સ? ફોન પર ઓનલાઇન જાણો ઉપલબ્ધતા, આ રહી સંપૂર્ણ રીત