વરસાદ પછી બાઈક માટે નવું ટાયર ખરીદવું છે? સારા પર્ફોર્મન્સ અને સેફ્ટી માટે આ બાબતોનું રાખો ધ્યાન

બાઈકના ટાયર તમારી રાઇડિંગ સુરક્ષા અને કંટ્રોલમાં મુખ્ય ભૂમિકા ભજવે છે. તેથી ટાયર બદલતી વખતે માત્ર કિંમત કે લુક જોઈને નિર્ણય લેવો યોગ્ય નથી. બાઈકનો વપરાશ, રસ્તાની સ્થિતિ અને કંપનીની ભલામણ મુજબ ટાયર પસંદ કરવું વધુ જરૂરી છે.

ટ્રેડ ઘસાઈ ગયો હોય તો સમજો ટાયર બદલવાનો સમય આવી ગયો છે: ટાયર બદલવાનો સૌથી સરળ સંકેત તેના ટ્રેડ (ખાંચા) ઘસાઈ જવા છે. જો ટાયરના ખાંચા પહેલાની સરખામણીએ ઘણા ઓછા ઊંડા થઈ ગયા હોય કે ટ્રેડ વિયર ઇન્ડિકેટર (TWI) સુધી પહોંચી ગયા હોય, તો નવું ટાયર લગાવી લેવું હિતાવહ છે.

માત્ર ટ્રેડ જ નહીં, ટાયરની સંપૂર્ણ સ્થિતિ પર નજર રાખવી પણ જરૂરી છે. જો સાઇડવોલ કે અન્ય કોઈ ભાગમાં કટ, તિરાડ, ઉપસેલો ભાગ (બલ્જ) કે નુકસાન દેખાય, તો આવું ટાયર વાપરવું જોખમી બની શકે છે. ખાસ કરીને હાઈ સ્પીડ પર ખરાબ ટાયર બાઈકના સંતુલન અને ગ્રીપને બગાડી શકે છે.

ટાયરની સાઇઝ પોતાની મરજીથી ન બદલો: નવું ટાયર ખરીદતી વખતે સૌથી પહેલા બાઈક ઉત્પાદક કંપની દ્વારા જણાવવામાં આવેલી સાઇઝ અને સ્પેસિફિકેશન ચકાસો. ટાયરનું માપ બાઈકના રિમ સાથે બરાબર મેચ થવું જોઈએ. જરૂર કરતાં મોટું કે નાનું ટાયર લગાવવાથી બાઈકની હેન્ડલિંગ, બેલેન્સ અને રાઇડ ક્વોલિટી પર સીધી અસર પડી શકે છે. તેથી ટાયરની સાઇડવોલ પર લખેલા નંબરો ધ્યાનથી જોઈને તે જ માપનું ટાયર પસંદ કરો.

ટ્યુબલેસ કે ટ્યુબ ટાયર? બાઈકમાં લાગેલા વ્હીલના પ્રકારના આધારે ટાયરની પસંદગી અલગ હોઈ શકે છે. સામાન્ય રીતે એલોય વ્હીલવાળી બાઈકમાં ટ્યુબલેસ ટાયર વપરાય છે, જ્યારે સ્પોક વ્હીલ (તારવાળા વ્હીલ) ધરાવતી બાઈકમાં ટ્યુબવાળા ટાયર જોવા મળે છે. ટ્યુબલેસ ટાયરનો મોટો ફાયદો એ છે કે પંચર થવા પર હવા તરત જ સંપૂર્ણ બહાર નીકળી જતી નથી, જેથી બાઈકને સુરક્ષિત જગ્યાએ કે નજીકના પંચર રિપેરિંગ શોપ સુધી લઈ જવાનો સમય મળી જાય છે.

હાઈવે અને સ્પીડ રાઇડિંગ માટે રેડિયલ ટાયર: જો બાઈકનો ઉપયોગ હાઈવે કે લાંબા અંતરની મુસાફરીમાં વધુ થતો હોય, તો રેડિયલ ટાયર સારો વિકલ્પ છે. તેનું નિર્માણ એવી રીતે થાય છે કે જેથી તે તેજ ગતિએ ઉત્તમ સ્થિરતા અને કોર્નરિંગમાં મદદ કરી શકે. તેની સાઇડવોલ પ્રમાણમાં વધુ ફ્લેક્સિબલ હોવાથી વળાંક લેતી વખતે બાઈકને યોગ્ય રીતે ઝુકાવવામાં મદદ મળે છે.

શહેરી રસ્તાઓ માટે જરૂરિયાત મુજબ પસંદગી કરો: જો બાઈક મોટાભાગે શહેરના પાકા રસ્તાઓ પર જ ચાલતી હોય, તો સારા સ્ટાન્ડર્ડ રોડ ટાયર પૂરતા છે. આવા ટાયરમાં સૂકા અને ભીના બંને રસ્તાઓ પર સંતુલિત પકડ (ગ્રીપ) આપતી ટ્રેડ પેટર્ન હોવી ઉપયોગી છે. તમારી રોજિંદી રાઇડિંગ કંડીશન અનુસાર યોગ્ય ટાયર પસંદ કરવું સમજદારીભર્યું છે.

ઓફ-રોડિંગ માટે અલગ ટાયર જરૂરી: જો બાઈક વારંવાર કાચા રસ્તા, માટી, પથ્થર કે ઓફ-રોડ ટ્રેક પર ચાલતી હોય, તો બ્લોક પેટર્ન કે નોબી (Knobby) ટાયર વધુ ઉપયોગી સાબિત થાય છે. તેના મોટા અને ઊંડા ખાંચા ઢીલી માટી અને ખાડા-ટેકરાવાળા રસ્તાઓ પર મજબૂત પકડ જાળવી રાખે છે. ચોમાસામાં પણ ટ્રેડ પેટર્ન ખૂબ મહત્વપૂર્ણ છે, કારણ કે ટાયરના ખાંચા રસ્તા અને ટાયર વચ્ચે રહેલા પાણીને ઝડપથી બહાર કાઢવામાં મદદ કરે છે જેથી બાઈક સ્લિપ થતી નથી.

રક્ષાબંધન પર રોકડને બદલે બહેનને આપો આ 4 ફાઇનાન્સિયલ ગિફ્ટ્સ, ભવિષ્યમાં બનશે લાખોનું ફંડ !