ચીની રોબોટ મુદે ગલગોટિયા યુનિવર્સિટી સામે લેવાશે એક્શન, કેન્દ્રીય મંત્રીએ શું કહ્યું જાણો

ઇન્ડિયા AI ઇમ્પેક્ટ સમિટમાં ચીની રોબોટિક ડોગને પોતાનું સંશોધન ગણાવનાર ગલગોટિયા યુનિવર્સિટીની મુશ્કેલીઓ વધી છે. કેન્દ્રીય મંત્રી ચિરાગ પાસવાને આ ઘટનાને મોટી ચૂક ગણાવી સમિટ પૂર્ણ થયા બાદ કડક કાર્યવાહીના સંકેત આપ્યા છે.

ઈન્ડિયા AI ઈમ્પેક્ટ સમિટ 2026’માં ગલગોટિયા યુનિવર્સિટી દ્વારા પ્રદર્શિત કરવામાં આવેલા રોબોટિક ડોગ (Unitree Go2) ને પોતાનું સ્વદેશી નવતર સંશોધન ગણાવવાનો વિવાદ હવે રાજકીય વળાંક લઈ રહ્યો છે. કેન્દ્રીય મંત્રી ચિરાગ પાસવાને ગુરુવારે આ મામલે અત્યંત આક્રમક નિવેદન આપતા તેને ભારતની વૈશ્વિક પ્રતિષ્ઠા પર દાગ સમાન ગણાવ્યું છે.

ચિરાગ પાસવાનનું આકરું વલણ: “આ ગંભીર ગુનો છે”

ચિરાગ પાસવાને મીડિયા સાથેની વાતચીતમાં સ્પષ્ટપણે જણાવ્યું હતું કે, “કોઈ યુનિવર્સિટી દ્વારા ચીની પ્રોડક્ટ પર પોતાનો માલિકી હક જતાવો એ માત્ર ભૂલ નથી પણ એક મોટી ચૂક છે. જ્યારે દેશમાં આટલી મોટી વૈશ્વિક AI સમિટ યોજાઈ રહી હોય, ત્યારે આવી ખોટી માહિતી આપવી એ ગંભીર બાબત છે.”

તેમણે વધુમાં ઉમેર્યું કે, યુનિવર્સિટીના પ્રતિનિધિ જે રીતે શબ્દોની રમત રમી રહ્યા હતા તે સ્પષ્ટપણે દર્શાવે છે કે તેઓ સ્થિતિને છુપાવવાનો પ્રયાસ કરી રહ્યા હતા. આનાથી આંતરરાષ્ટ્રીય મંચ પર ભારતની છબી ખરડાઈ છે.

સમિટ પૂરી થયા બાદ થશે એક્શન

મંત્રીએ ચેતવણી આપી છે કે હાલ સમિટ ચાલુ હોવાથી સરકાર પરિસ્થિતિ પર નજર રાખી રહી છે. પરંતુ જેવી આ ઈવેન્ટ પૂર્ણ થશે, સરકાર નક્કી કરશે કે ગલગોટિયા યુનિવર્સિટી સામે કેવા પ્રકારના કડક પગલાં લેવા જોઈએ. બીજી તરફ, શિવસેના (UBT) ના સાંસદોએ પણ આ મામલે ભારે દંડ અને યુનિવર્સિટી વિરુદ્ધ કડક કાર્યવાહીની માંગ કરી છે.

શું હતો સમગ્ર વિવાદ?

ગલગોટિયા યુનિવર્સિટીના પેવેલિયન પર કોમ્યુનિકેશન પ્રોફેસર નેહા સિંહે એક ઇન્ટરવ્યુમાં દાવો કર્યો હતો કે ત્યાં બતાવવામાં આવેલ રોબોટિક કૂતરો યુનિવર્સિટીના ‘સેન્ટર ઓફ એક્સેલન્સ’ દ્વારા બનાવવામાં આવ્યો છે અને તેનું નામ ‘ઓરિયન’ રાખ્યું છે. જોકે, થોડી જ વારમાં ખબર પડી કે તે ચીની કંપની ‘યુનિટ્રી રોબોટિક્સ’નું મોડલ ‘Unitree Go2’ છે.

સોશિયલ મીડિયા પર ભારે ટીકા થયા બાદ પ્રોફેસરે તેને ‘મિસ-કોમ્યુનિકેશન’ ગણાવ્યું હતું, જ્યારે યુનિવર્સિટીએ આ નિવેદનથી છેડો ફાડી નાખ્યો હતો અને માફી માંગી હતી. જોકે, સરકાર હવે આ માફીથી સંતુષ્ટ જણાતી નથી.

LIC એ લોન્ચ કર્યો નવો ટેકનોલોજી ફંડ NFO; રોકાણની નવી તક, જાણો એક્સપર્ટની સલાહ, વાંચવા માટે અહીં ક્લિક કરો