જૂન મહિનાનું પહેલું અઠવાડિયું ‘ખાસ’! આવી રહ્યા છે એકથી એક ચડિયાતા ‘IPO’, રોકાણકારો ‘દાવ’ લગાવવા તૈયાર

શેરબજારમાં IPO રોકાણકારો માટે જૂન 2026નો પ્રથમ સપ્તાહ ઘણો વ્યસ્ત રહેવાનો છે. લાંબા સમય પછી મેઈનબોર્ડ સેગમેન્ટમાં 2 નવા IPO દસ્તક આપવા જઈ રહ્યા છે, જ્યારે SME પ્લેટફોર્મ પર પણ 4 કંપની પોતાના ઈશ્યૂ લઈને આવી રહી છે. આ ઉપરાંત 6 કંપનીઓના શેર આગામી સપ્તાહે સ્ટોક એક્સચેન્જ પર લિસ્ટ થવાના છે, જેનાથી પ્રાઈમરી માર્કેટમાં ગતિવિધિઓ તેજ રહેવાની આશા છે. તાજેતરના મહિનાઓમાં IPO માર્કેટમાં રોકાણકારોનો રસ સતત જળવાઈ રહ્યો છે. એવામાં આગામી સપ્તાહમાં રોકાણકારો પાસે વિવિધ સેક્ટરની કંપનીઓમાં દાવ લગાવવાની તક રહેશે.

આગામી સપ્તાહે ખુલનારા મેઈનબોર્ડ IPOમાં CMR Green Technologies સૌથી વધુ ચર્ચામાં રહેલો ઈશ્યૂ છે. આ IPO 3 જૂનથી 5 જૂન સુધી રોકાણકારો માટે ખુલ્લો રહેશે. કંપનીએ આ માટે પ્રતિ શેર 183 રૂપિયાથી 192 રૂપિયાની પ્રાઇસ બેન્ડ નક્કી કરી છે. આ 630.88 કરોડ રૂપિયાનો ઓફર ફોર સેલ (OFS) ઈશ્યૂ છે, જે હેઠળ 3.28 કરોડ શેર વેચવામાં આવશે. એક લોટમાં 78 ઈક્વિટી શેર સમાવિષ્ટ હશે. CMR Green Technologies મેટલ રિસાયકલિંગ અને મેન્યુફેક્ચરિંગ બિઝનેસમાં સક્રિય છે. વધતી જતી રિસાયકલિંગ ઇન્ડસ્ટ્રી વચ્ચે આ IPO પર રોકાણકારોની ખાસ નજર રહેવાની શક્યતા છે.

મુંબઈ સ્થિત Hexagon Nutritionનો IPO 5 જૂનથી 9 જૂન સુધી ખુલ્લો રહેશે. કંપનીએ પ્રતિ શેર 42 રૂપિયાથી 45 રૂપિયાની પ્રાઇસ બેન્ડ નક્કી કરી છે. 138.87 કરોડ રૂપિયાનો આ IPO સંપૂર્ણપણે OFS આધારિત છે, જેમાં પ્રમોટર્સ પોતાનો હિસ્સો વેચશે. એક લોટમાં 333 શેર હશે. વર્ષ 1993માં સ્થપાયેલી Hexagon Nutrition ન્યુટ્રિશન અને હેલ્થકેર ક્ષેત્રની અગ્રણી કંપની છે. કંપનીના પોર્ટફોલિયોમાં Obesigo, Pediagold અને Pentasure જેવી બ્રાન્ડ્સ જોડાયેલી છે. હેલ્થ અને વેલનેસ સેક્ટરમાં વધતી માંગને જોતાં આ IPOને લઈને પણ સારો ઉત્સાહ જોવા મળી શકે છે.

મેઈનબોર્ડ IPO ઉપરાંત SME સેગમેન્ટમાં પણ ચાર કંપની રોકાણકારો માટે ઈશ્યૂ લઈને આવી રહી છે. Merritronix IPO 1 જૂનથી 3 જૂન સુધી ખુલશે. કંપની 70.03 કરોડ રૂપિયા એકત્ર કરવાની યોજના બનાવી રહી છે. તેની પ્રાઇસ બેન્ડ પ્રતિ શેર 141 રૂપિયાથી 149 રૂપિયા નક્કી કરવામાં આવી છે. Liotech Industries IPO પણ 1 જૂનથી 3 જૂન સુધી ખુલ્લો રહેશે. આ 36.02 કરોડ રૂપિયાનો ઈશ્યૂ છે અને તેની ફિક્સ્ડ ઈશ્યૂ પ્રાઈસ પ્રતિ શેર 321 રૂપિયા રાખવામાં આવી છે.

Vahh Chemicals IPO 4 જૂનથી 8 જૂન સુધી રોકાણ માટે ઉપલબ્ધ રહેશે. કંપની 13.45 કરોડ રૂપિયા એકત્ર કરશે અને શેરની કિંમત પ્રતિ શેર 60 રૂપિયા નક્કી કરવામાં આવી છે. Genxai Analytics IPO 5 જૂનથી 9 જૂન સુધી ખુલશે. 54.84 કરોડ રૂપિયાના આ ઈશ્યૂની પ્રાઇસ બેન્ડ પ્રતિ શેર 110 રૂપિયાથી 116 રૂપિયા રાખવામાં આવી છે.

આગામી સપ્તાહે પ્રાઈમરી માર્કેટમાં માત્ર નવા IPO જ નહીં આવે પરંતુ 6 કંપનીઓના શેરનું લિસ્ટિંગ પણ થશે. આમાં MR Maniveni, Yaashvi Jewellers, Harikanta Overseas, Rajnandini Fashion India, SMR Jewels અને Aureate Tradde ના નામ છે. જૂનના પ્રથમ સપ્તાહમાં IPO અને લિસ્ટિંગની પ્રક્રિયાઓ વધવાથી રોકાણકારોની નજર બજાર પર ટકેલી રહેશે.

આવી ગઈ તારીખ ! જુલાઈમાં ધમાકો કરવા તૈયાર છે આ ક્વિક ‘કોમર્સ કંપની’, આવી શકે છે ₹11,000 કરોડનો ‘IPO’