Breaking News: IPLમાં ચોથી વખત ક્વોલિફાયર-1 રમશે રોયલ ચેલેન્જર્સ બેંગલુરુ, જાણો કેવો છે ટીમનો રેકોર્ડ

IPL 2026માં રોયલ ચેલેન્જર્સ બેંગલુરુ ફરી એકવાર ક્વોલિફાયર-1માં રમવા તૈયાર છે. શુભમન ગિલની કપ્તાની હેઠળની ગુજરાત ટાઇટન્સ સામે ધર્મશાળાના હિમાચલ પ્રદેશ ક્રિકેટ એસોસિએશન સ્ટેડિયમમાં આ મહત્વપૂર્ણ મુકાબલો રમાશે. IPLના ઇતિહાસમાં આ ચોથી વખત છે જ્યારે RCB ક્વોલિફાયર-1માં પહોંચી છે. ખાસ વાત એ છે કે ટીમ અગાઉ જ્યારે પણ ક્વોલિફાયર-1માં રમી છે, ત્યારે ફાઇનલ સુધી પહોંચવામાં સફળ રહી છે.

લીગ સ્ટેજમાં સતત શાનદાર પ્રદર્શન બાદ RCB પોઈન્ટ ટેબલમાં ટોચ પર રહી હતી. ટોચની બે ટીમોને ફાઇનલમાં પહોંચવા માટે બે તક મળતી હોવાથી RCB માટે આ મોટો ફાયદો સાબિત થઈ શકે છે. બેટિંગ અને બોલિંગ બંને વિભાગમાં ટીમે સંતુલિત રમત દેખાડી છે.

IPLમાં પ્લેઓફ સિસ્ટમ 2011થી શરૂ થઈ હતી અને તે વર્ષે RCB પ્રથમ વખત ક્વોલિફાયર-1માં પહોંચી હતી. જોકે, ચેન્નાઈ સુપર કિંગ્સ સામે ટીમને 6 વિકેટે હારનો સામનો કરવો પડ્યો હતો. તેમ છતાં RCB બાદમાં ફાઇનલ સુધી પહોંચી હતી.

2016ની સિઝનમાં RCBએ ફરી ક્વોલિફાયર-1માં સ્થાન મેળવ્યું હતું. ગુજરાત લાયન્સ સામેની મેચમાં શરૂઆતમાં પાંચ વિકેટ ગુમાવ્યા છતાં ટીમે શાનદાર વાપસી કરી અને 4 વિકેટે જીત મેળવી હતી. વિરાટ કોહલી અને એબી ડિવિલિયર્સની જોડી તે સિઝનમાં ટીમની સૌથી મોટી તાકાત બન્યા હતા.

IPL 2025માં પંજાબ કિંગ્સ સામે રમાયેલી ક્વોલિફાયર-1 મેચમાં RCBએ એકતરફી જીત મેળવી હતી. ટીમે 60 બોલ બાકી રહેતા જ 8 વિકેટે વિજય મેળવ્યો હતો. આ જીત સાથે RCBએ ક્વોલિફાયર-1માં પોતાની બીજી જીત નોંધાવી હતી. ખાસ વાત એ છે કે RCB IPL 2025માં પ્રથમ વખત ચેમ્પિયન બની હતી.

એકંદરે જોવામાં આવે તો RCBએ અત્યાર સુધી IPL પ્લેઓફમાં 17 મેચ રમી છે, જેમાં ટીમને 7 જીત અને 10 હાર મળી છે. ટીમ હવે એક વખત ફરી ક્વોલિફાયર-1માં જીત મેળવી સીધી ફાઇનલમાં પહોંચવાનો પ્રયાસ કરશે. ચાહકોને આશા છે કે RCB 2025 પછી ફરી એકવાર ખિતાબ જીતવાની દાવેદાર સાબિત થશે. (PC:PTI/X)

Breaking News : શુભમન ગિલના નિશાના પર વૈભવ સૂર્યવંશી, GT ના 3 ખેલાડીઓ પાસે ઓરેન્જ-પર્પલ કેપ જીતવાની ગોલ્ડન તક