અહાન શેટ્ટીની એક્શન-ડ્રામા ફિલ્મ ‘સનકી’નું 30 ઓક્ટોબરથી શૂટિંગ થશે શરૂ, 2027માં થશે રિલીઝ

બોલિવૂડ અભિનેતા સુનીલ શેટ્ટીનો પુત્ર અહાન શેટ્ટી પોતાની આગામી ફિલ્મ ‘સનકી’ સાથે ફરી એકવાર એક્શન અવતારમાં જોવા મળશે. ફિલ્મના નિર્માતાઓ 30 ઓક્ટોબરથી મધ્યપ્રદેશના ભોપાલમાં તેનું શૂટિંગ શરૂ કરવાની તૈયારીમાં છે. ‘રુસ્તમ’ અને ‘મિશન રાણીગંજ’ જેવી ફિલ્મોનું દિગ્દર્શન કરી ચૂકેલા ટીનુ સુરેશ દેસાઈ આ ફિલ્મ ડિરેક્ટ કરશે.

પ્રેમકથા સાથે એક્શનનો તડકો

‘સનકી’ની વાર્તા જ્ઞાનન્દ્ર વાસુદેવે લખી છે. ફિલ્મની મુખ્ય વાર્તા પ્રેમકથા પર આધારિત છે, જેમાં લાગણીઓની સાથે જબરદસ્ત એક્શન અને રોમાંચ પણ જોવા મળશે. જોકે, ફિલ્મના વિષય અને વાર્તા અંગેની વધુ વિગતો હાલ ગુપ્ત રાખવામાં આવી છે. નિર્માતાઓ સમયાંતરે ફિલ્મ સાથે જોડાયેલી માહિતી જાહેર કરશે.

ભોપાલમાં તૈયારીઓ શરૂ

ફિલ્મના દિગ્દર્શક ટીનુ સુરેશ દેસાઈ વિશાળ ટીમ સાથે ભોપાલ પહોંચી ગયા છે. 30 ઓક્ટોબરથી શૂટિંગ શરૂ થાય તે પહેલાં ફિલ્મની તૈયારીઓને આખરી ઓપ આપવામાં આવી રહ્યો છે. ફિલ્મનું શૂટિંગ શરૂ થતાં જ કલાકારો અને ટીમ એક્શન દૃશ્યો સહિતના વિવિધ સિક્વન્સ પર કામ કરશે.

‘બોર્ડર 2’ બાદ અહાનના નવા પ્રોજેક્ટ્સ

‘બોર્ડર 2’માં અહાન શેટ્ટીના અભિનય અને ફિલ્મની સફળતા બાદ અભિનેતા હવે પોતાના આગામી પ્રોજેક્ટ્સ પસંદ કરવામાં ખાસ સાવચેતી રાખી રહ્યો છે. ‘સનકી’ બાદ તે વિક્રમ ભટ્ટની ફિલ્મ ‘1920 કોલ્ડ વિન્ટર’માં જોવા મળશે. આ ઉપરાંત તેની અન્ય કેટલીક ફિલ્મોનું શૂટિંગ 2027માં શરૂ થવાનું આયોજન છે.

2027ના પ્રથમ છ મહિનામાં રિલીઝનું આયોજન

‘સનકી’નું નિર્માણ We The People, Roaring River Productions અને Pals & Peers Entertainment દ્વારા કરવામાં આવી રહ્યું છે. નિર્માતાઓએ ફિલ્મને 2027ના પ્રથમ છ મહિનામાં સિનેમાઘરોમાં રિલીઝ કરવાની યોજના બનાવી છે. ફિલ્મની વાર્તા અને અન્ય કલાકારો અંગેની વિગતો આગામી સમયમાં જાહેર થવાની શક્યતા છે.

Breaking News : ‘બિગ બોસ 20’ માં ગુલ્લુ અને યંગ ડીએસએ વચ્ચે ઝઘડો થયો, ચાહકોએ બહાર કાઢવાની માંગ કરી, આ સ્ટોરી વાંચવા અહીં ક્લિક કરો