Gold Silver Price : સોનું અને ચાંદી ખરીદવા માટે ગોલ્ડન ચાન્સ! ત્રણ દિવસમાં ચાંદી 23,500 રૂપિયા થયું સસ્તું

રાષ્ટ્રીય રાજધાની દિલ્હીમાં મંગળવારે કિંમતી ધાતુઓના ભાવમાં નોંધપાત્ર ઘટાડો નોંધાયો છે. નબળા વૈશ્વિક સંકેતોના કારણે ચાંદીના ભાવમાં આશરે 2 ટકાનો ઘટાડો થયો છે. પરિણામે ચાંદીનો ભાવ ઘટીને ₹2.45 લાખ પ્રતિ કિલોગ્રામ થયો છે, જ્યારે સોનાનો ભાવ ઘટીને ₹1.57 લાખ પ્રતિ 10 ગ્રામ રહ્યો છે. સતત ઘટાડાને કારણે બજારમાં ખરીદી માટે અનુકૂળ સ્થિતિ ઉભી થઈ છે.

12 ફેબ્રુઆરીથી ચાંદીના ભાવમાં સતત ઘટાડો જોવા મળી રહ્યો છે. આ સમયગાળા દરમિયાન ચાંદી ₹23,500 સુધી સસ્તી થઈ છે. 12 ફેબ્રુઆરીએ દિલ્હી બુલિયન બજારમાં ચાંદીનો ભાવ ₹2,68,500 પ્રતિ કિલોગ્રામ હતો, જે હવે ઘટીને ₹2,45,000 રહ્યો છે. બીજી તરફ, બે દિવસના વધારા બાદ સોનાના ભાવમાં પણ ઘટાડો નોંધાયો છે.

ઓલ ઈન્ડિયા સરાફા એસોસિએશનના આંકડા મુજબ, 99.9 ટકા શુદ્ધતાવાળા સોનાનો ભાવ ₹2,200 અથવા આશરે 1.4 ટકા ઘટીને ₹1,57,000 પ્રતિ 10 ગ્રામ થયો છે. અગાઉના સત્રમાં સોનાનો ભાવ ₹1,59,200 પ્રતિ 10 ગ્રામ હતો. બજાર વિશ્લેષકોનું કહેવું છે કે વૈશ્વિક પરિબળો અને ઓછી લેવડદેવડના કારણે કિંમતી ધાતુઓ પર દબાણ આવ્યું છે.

આંતરરાષ્ટ્રીય બજારમાં પણ સોનું અને ચાંદી બંનેમાં ઘટાડો નોંધાયો છે. સ્પોટ ચાંદી 2.15 ટકા ઘટીને 74.96 અમેરિકન ડોલર પ્રતિ ઔંસ પર આવી ગઈ છે, જ્યારે સોનું 1.04 ટકા ઘટીને 4,938.70 અમેરિકન ડોલર પ્રતિ ઔંસ પર ટ્રેડ થઈ રહ્યું છે. એશિયન બજારોમાં રજાઓ અને નરમ અમેરિકન ફુગાવાના આંકડાઓના કારણે રોકાણકારોમાં સાવચેતીનું વલણ જોવા મળ્યું છે.

વિશ્લેષકો જણાવે છે કે ચીનમાં ચંદ્ર નવા વર્ષની રજાઓના કારણે માંગમાં ઘટાડો થયો છે, જે સોના-ચાંદીના ભાવ પર અસરકારક બન્યો છે. ઉપરાંત, યુએસ ફેડરલ રિઝર્વ દ્વારા ભવિષ્યમાં વ્યાજ દરમાં ઘટાડાની શક્યતાઓએ પણ બજારની દિશા પર અસર કરી છે.

આગામી દિવસોમાં બજારનો રૂખ ભૂરાજકીય પરિસ્થિતિઓ અને મહત્વપૂર્ણ આર્થિક આંકડાઓ પર નિર્ભર રહેશે. યુએસ રોજગાર અહેવાલ અને રશિયા-યુક્રેન સંબંધિત ચર્ચાઓ જેવા પરિબળો સલામત રોકાણ તરીકે ગણાતી સોનાની માંગ પર સીધી અસર કરી શકે છે. હાલની સ્થિતિને જોતા, નિષ્ણાતોનું માનવું છે કે નજીકના સમયમાં ભાવ મર્યાદિત દાયરા અંદર જ હલચલ કરી શકે છે.

સતત બીજા દિવસે સોનાનો ભાવ ઘટ્યો, ચાંદીનો ભાવ પણ ઘટ્યો